Дел од причините поради кои, средношколците со кои разговаравме во вторникот, не одат на училиште со велосипед се: (1) големата оддалеченост на училиштето од нивниот дом; (2) временските услови и, особено, студеното време во зима и жештините во лето; (3) стравот од возење велосипед во сообраќај, како и (4) стравот дека велосипедот ќе им биде украден.
Но, колку од овие причини и стравови можат да бидат надминати кај значаен дел од средношколците доколку им понудиме соодветна едукација и соодветна поддршка за возење велосипед во сообраќај, пак и ја подобриме вело инфраструктурата, особено поврзаноста на вело патеките, пак и сообраќајната култура во градот?!
На 13 декември, заедно со експертот за урбан велосипедизам, Дарко Арсовски одржавме една таква #вело работилница посветена токму на темата „Со велосипед до училиште“. На речиси 40 ученици од I и II година во средните училишта во земјата им зборувавме за причините заради кои велосипедот е брзо, безбедно и еколошко превозно средство, за задолжителната опрема за секој велосипедист, за опремата која е препорачливо да ја имаат при сообраќаење со велосипед… им дадовме практични примери за како да се облечат при различни временски услови, особено на студеното време како деновиве, зборувавме за сообраќајните правила, рачна сигнализација, пак и законската регулатива за сообраќај на велосипеди.
Домаќини на работилницата беа СУГС „Георги Димитров“ – Скопје, а освен нивни ученици, имавме ученици и од други десетина училишта во Скопје.
–
Работилницата за средношколци беше организирана во рамки на проектот „Камп за одржливост – Епизода бр. 6: Вело млади“.
Целта е да се промовира велосипедот како брзо, безбедно и еколошко превозно средство.
Проектот е ко-финансиран од Град Скопје и истиот го спроведува Eco – Logic и Вело Училишта.
