Покрај осумте младински иницијативи за животна средина и климатски промени на градинките, наградени беа и пет одделни младински иницијативи од наставници и основни училишта во државата. Првата на која и се посветуваме денес е „ВОЛШЕБНИОТ СТАКЛЕНИК“ на Виолета Стевановска и ООУ „Климент Охридски“ – Битола.
Тоа што треба да знаете за иницијативата е дека идејата за стакленикот потекнува од самите ученици кои преку „brainstorming“ разговараа и гласаа за идеја која сакаат и која можат да ја реализираат во училишниот двор. Иницијативата еволуираше околу идејата за засадување на растенија – прочистувачи на воздухот во затворените простории, како и нивно набљудување и истражување во рамки на училишна лабораторија – Стакленик. Преку активностите во рамки на иницијативата, учениците се стекна со знаења за растенијата, за фотосинтеза и начини на размножување, вклучително и за користење на микроскоп. Во рамки на активностите, учениците беа активно вклучени во истражувањето на растенијата и идентификација на оние растенија кои го прочистуваат воздухот од една страна, а од друга страна се практични и украсни за поставување во училниците. Дополнително, учениците самостојно засадуваат и размножуваат растенија, истите ги одгледуваат, и пишуваат дневници за работа, од кои подоцна се изработи Прирачник.
–
Кон крајот на март и април, Еко Логик организираше натпревар за градинките и училиштата во кој, право на учество имаа само оние кои ја минаа обуката „Искуствено учење и интеграција на концепти од природните науки, животната средина и климатските промени во образовниот систем“. Обуката беше организирана во 2021 година во рамки на проектот на „Охрабрување на децата и младите во Северна Македонија да станат двигатели на промените за намалување на ранливоста на заедниците од климатските промени“, спроведуван од УНИЦЕФ со финансиска поддршка од Шведска. Во рамки на проектот беше организиран и самиот натпревар како и националната конференција „Искуствено учење од областа на животната средина и климатските промени“ (5-6 октомври) на која и беа промовирани победниците.
