Нашиот тридневен камп за граѓанска наука и животна средина заврши на 9 јуни. Две групи од по 30 млади учесници, вклучувајќи професори од средните училишта од Скопје и Кочани, како и шампионите од ОУ Малина Попиванова Кочани, учествуваа во Камп Охрид дел од проектот„Хаб на истражувачи” кој се одржа во Извидничкиот Центар Охрид.
Учесниците имаа можност да учествуваат во интерактивната потрага по специфични растенија во кампот со колегата Драган, да спроведат експеримент за загадување на почвата со Цаци, и да присуствуваат на краткото предавање „зошто и како“ за граѓанска наука и искуствено учење со Стојне и Никола. Дополнително, беа организирани и работилница за активизам и планирање на еко акции и еко истражувачки иницијативи со Мартина, сесија за еко и хуман урбан простор со Ива, како и брза екскурзија и предавање за „белите дробови на Охридското езеро“ – Студенчишко блато со Кате од Охрид СОС, Сашо и Виктор од Лихнид.
Во рамки на активностите, учесниците учествуваа и во акции за чистење на Охридското езеро со Никола Паскали.
Искажуваме благодарност до директорите и професорите од СУГС Гимназија “Орце Николов”, СУГС Гимназија „Панче Арсовски“ – Скопје, СЕПУГС Васил Антевски Дрен, СУГС Владо Тасевски, СУГС „Марија Кири – Склодовска“ – Скопје, СОУ „Гошо Викентиев“ Кочани, и ОУ Малина Попиванова Кочани, како и на одличната екипа на млади учесници.
Активностите во рамки на кампот беа организирани како дел од проектот „Хаб на истражувачи“, поддржан од Американската Амбасада во Скопје, Македонија.
Се надеваме дека ова искуство ќе ги поттикне младите и наставниците да продолжат со истражувањето и грижата за животната средина, применувајќи научни методи и споделувајќи ги своите откритија со заедницата.
