Еко Логик и Јавната установа Детски дом „11 Октомври“ – Скопје потпишаа Меморандум за соработка, со кој поставуваат темели за долгорочно партнерство насочено кон создавање нови можности за личен развој, еколошка едукација и активно учество на децата и младите во заедницата.
Партнерството претставува важен чекор кон заедничко делување во области од особено значење за идните генерации – подигнување на еколошката свест, промовирање на одржлив развој, климатска акција, заштита на природата и биодиверзитетот, како и поттикнување на активно граѓанство, волонтерство, неформално образование и социјална инклузија.
Во рамките на соработката ќе се организираат разновидни активности преку кои децата и младите ќе имаат можност да учат преку практично искуство. Предвидени се едукативни работилници, еко-кампови, акции за пошумување, чистење и уредување на јавни простори, активности за селекција и рециклирање на отпад, како и бројни иницијативи кои ќе придонесат за развој на знаења, вештини и навики за одговорен однос кон животната средина.
Покрај активностите со децата и младите, партнерството опфаќа и подготовка и имплементација на локални, национални и меѓународни проекти, размена на знаења, искуства и добри практики, како и јакнење на капацитетите на стручниот кадар во двете организации.
Со потпишувањето на Меморандумот, Еко Логик и ЈУ Детски дом „11 Октомври“ – Скопје ја потврдуваат својата заедничка посветеност кон создавање инспиративна, безбедна и инклузивна средина во која секое дете и млад човек ќе има можност да учи, да се развива, да волонтира и активно да придонесува кон својата заедница.
Веруваме дека ова партнерство ќе прерасне во бројни успешни иницијативи кои ќе создадат долгорочни позитивни промени – не само за децата и младите, туку и за локалната заедница и животната средина. Заедно градиме генерации кои ќе ја препознаваат вредноста на природата, ќе дејствуваат одговорно и ќе бидат двигатели на позитивни промени.
