На 6 октомври 2022 година се одржа и вториот ден од Националната конференција за искуствено учење во областа на животната средина и климатските промени. На конференцијата учествуваа осумдесетина воспитувачи и директорки на градинки кои, во изминатата година беа активно вклучени во нашите активности.
– Токму детските градинки се одлична можност да ги воспитаме децата да развијат ставови и однесување што ќе ги пренесат и во текот на животот значајно ќе влијаат врз нашата култура на живеење. Преку учење низ игра, децата го изразуваат и го прошируваат разбирањето за себе и своето влијание во светот околу нив. Па со ваквото потенцијално предучилишно воспитување можат да се постават темелите за еколошки свесни и проактивни граѓани, истакна заменик-министерот за труд и социјална политика, г. Енвер Хусејин.
– Благодарение на владата во Шведска, УНИЦЕФ всушност работи на подобрување на животната средина, да се зајакне наставното учење на наставниците и едукаторите со цел да се зајакне целата едукативна програма во предучилишна возраст и на училиште, рече заменик-претставникот на УНИЦЕФ, г. Артур Ајвазов.
Од почнувањето на проектот во август 2021 година, речиси 22 илјади пати, децата од градинките беа вклучени во експерименти. Спроведени беа повеќе од илјада експерименти со речиси 2 илјади деца вклучени.
Дополнително, организирани беа две обуки за градење на капацитетите за темите за животна средина и климатски промени на воспитувачите во кои, учествуваа шеесетина воспитувачи од 40+ градинки.
–
Конференцијата се организираше во рамки на проектот „Охрабрување на децата и младите во Северна Македонија да станат двигатели на промените за намалување на ранливоста на заедниците од климатските промени“, спроведуван од УНИЦЕФ со финансиска поддршка на Шведска. Еко Логик е имплементирачки партнер во проектот.
